Wednesday, January 13, 2021

በዓል እና ባሕል ለየቅል !

መስከረም 22 ቀን 2013 ዓ.ም

በዓል እና ባሕል ለየቅል !

ድልድዩን ሲሻገሩ የዝሆኑ ጀርባ ላይ ሁና ድልድዩን አንቀጠቀጥነዉ ያለችዉ አይጥ ትዝ ስትለኝ ፈገግ እላለሁ፤

የከንፈር እና የልብ ሁለት ኢትዮጵያዎች ያሉ ይመስለኛል፤ የልብ ኢትዮጵያችንን ይጠብቅልን !

አንድ በዓል ሲከበር ለማክበር የማይወጡ ነገር ግን ከፈጣሪ ጋር ያሉ ሰዎች በጣም ያስገርሙኛል፤ያስደስቱኛልም!

እነርሱ በዓልን የሚያከብሩት ተሰጥመዉ ዉስጠ ገብተዉ እንጂ ጎን ያለዉን ጓደኛቸዉ ምን ለበሰ፤ ምን ተናገረ፤ እንዴት አከበረ፤ የትኛዉ ሚዲያ ተገኘ፤ የትኛዉ ሹም ታደመ፤ የትኛዉ ንግግር አማረ፤ የትኛዉ ንግግር አጠረ፤ በምን ያኽል ጊዜ ተጠናቀቀ፤ የትኛዉ ተባለ የትኛዉ ሳይባል ቀረ፤ ብለዉ አይደለም፤

እነርሱ የሚተራመሰዉን ሰዉ ሳይሆን የሚያዩት ሁሌም የማይቀየሩትን ዛፎችን፤ ተራሮችን፤ መንገዶችን፤ወንዞችን፤ሰማዩን እና እንደ ሁኔታዉ የማይቀያየሩትን እኒኽን የፈጠረዉን ፈጣሪ እያዩ ያከብራሉ፤ ብዙ ጊዜ አደባባይ መዉጣት ደስ አያሰኛቸዉም፤ እዩኝ እዩኝ ባዩ ከተበተነ በኋላ የቦታዉን በረከት ለማግኘት ከቦታዉ ጋር ለመነጋገር ይገኛሉ፤ ቦታዉም ማን እንዴት እንዳከበረ ይዘግብላቸዋል፤

በዓል እና ባሕል ሁለቱም ለየቅል መሆናቸዉን ስለሚያዉቁ ከወርና ከሁለት ወር በፊት ምን ልለብስ ነዉ ጥያቄ አይመለከታቸዉም፤

የእነዚህ አስተዋዮች ጥበብ ሁሌም ስለሚገርመኝ እንደነሱ ባረገኝ እያልኩ እጸልያለሁ!

ወገኞቼ ! ሃገራችን ፈጣሪ አይተዋትም ብለን አምነን ሁሌም እንጸልይላታላን፤ በተለይ በአሁኑ ወቅት ጊዜአዊ መኖሪያችን መሆኗን ረስተን ለዘለዓለም እንደተሰጠችን አስበን፤ ከኛ በላይ ማንም ሊኖርባት አይችልም እያልን ጀመርነዉ ገመድ ጉተታ ትርፉ ድካም ብቻ ነዉ፤

ለዘለዓለማዊ መኖሪያችን እንደማሰብ ለዚህ እንደ መኪና ጎማ ለሚተነፍስ ዕድሜ ባለማወቃችን እንደጅብ የጎንዮሽ እየተያየን መኖሩ ዉርደት ነዉ፤ ዛፉ ወንዙ ሰማዩ መንገዱ ሁሉም ፍጥረታት እየታዘቡን እንደሆነ ማወቅ ይገባናል፤ 

አንድ ነገር ብቻ እናስተዉል፤ ሕዝብ ጠላ እግዚአብሔር ጠላ !!! አባቶቻችን የሚናገሩት ብሒል ያለምክንያት አየደለም፤

ሕዝብ ምን አለ ፤ ወደደዉ ወይስ ጠላዉ ፤ ከጠላዉ ልተወዉ ፤ ከወደደዉ ላድርገዉ የሚል መሪ ካለ ይኽችን የኮንትራት ጊዜአዊ ዕድሜ ደስ ብሎን እናልፋለን፤ ይኽ ካልሆነ ግን እጅ አመድ አፋሽ ሁኖ ፤ 99 በመቶ ብትሰራ በ1 በመቶ ስህተት በዜሮ እየተባዛ ድካም ከንቱ ይሆናል፤ ፈጣሪም በጠብታ ዋንጫዋ ስትሞላ ክንዱን ይዘረጋል፤ ያን ጊዜ የነበረዉ እንዳልነበር ይሆናል፤

በማስተዋል እንጓዝ፤ ከልብ እንጂ ከከንፈር አንዋደድ፤ ሃገሪቱም ፈጣሪ ለሚያኖራት እኛ አንዘዝባት፤ እኩልነት ሳይሆን መከባበር ይቅደም!

መዝሙረ ዳዊት 71 የየዕለት ጸሎታችን እንዳልተዘነጋ ይሰማኛል፤ ኃይል የእርሱ ብቻ ስለሆነ ፤ የከንፈሯን ሳይሆን የልብ ኢትዮጵያችንን ይጠብቅልን ፤የበረከት ዘመን ያድርግልን፤ አሜን + + +


Saturday, August 22, 2020

አልቦቱ ክርስትና ዘእንበለ ዝንቱ ፤ ከዚህ ዉጪ ክርስትና የለም !

 ሰላም ለኩልክሙ !

ነሐሴ 15 ቀን 2012 ዓ.ም

የድንግል ማርያም ስጋ እንዲነሳ እና እንዲያርግ ምክንያት የሆነበት !

አንድ ክርስቲያን ሊያዉቃቸዉ ግድ የሆኑ የመድኃኒታችን የኢየሱስ ክርስቶስ ነገሮች ፤( ነገረ ክርስቶስ )!

ከቤታችን በትልቁ ጽፈን ልንሰቅለዉ የሚገባ ፤ ስንወጣ ስንገባ ልናየዉ ልናስተምረዉ የሚገባ ግዴታችን!

የሃይማኖታችን መሰረት ፤ በዚህ ዉስጥ ቅድስት ሥላሴ፤ ቅድስት ድንግል ማርያም እና ቅዱሳን ያሉበት መደምደያ ነዉ!

9 ዓቢይ በዓላት

1.      ትስብዕት  -  ሰዉ የሆነበት የ40 ቀን ጽንስ ሆኖ በድንግል ማኅጸን የተገኘበት መጋቢት 29

2.     ልደት  -  በቤተልሔም በበረት የተወለደበት ሰዎች ሳይዉቁት እንስሳት እስትንፋሳቸዉን ያሞቁበት ታህሳስ 29

3.     ጥምቀት  - ዮር እና ዳኖስ ፤ ሰማይና ምድር፤ ሰዉና መላዕክት አንድ የሆኑበት ዉሃ የተቀደሰበት ክርስትና የተወለደበት ጥር 11

4.     ደብረ ታቦር - ሰዉ ብቻ አለመሆኑ የታወቀበት መለኮቱን በትንሹ ያሳየበት እንደየደረጃቸዉ ምስጢር የገለጸበት ነሐሴ 13

5.     ሆሳዕና -  የአህያን ታዛዥነትን ያወደሰበት፤ ንጉስነቱን ለሕጻናት የገለጸበት ፤ድንጋይን ያናገረበት ከትንሳኤ በፊት ያለዉ እሑድ

6.     ስቅለት  - በመስቀል ዙፋኑ የነገሰበት፤ መስቀልን በደሙ አትቶ ለመድኃኒትነት የሰጠበት፤ ሲኦልን ባዶ ያደረገበት አርብ

7.     ትንሣኤ - የሰዉን ስጋ አምላክ ያደረገበት ፤ መቃብርን ያሸነፈበት ፤ ደስታን ለዘለዓለም የሰጠበት እሑድ

8.     ዕርገት  - የሰዉ ስጋን ወደሰማይ ያወጣበት ፤ ምድር ጊዜአዊ መሆኗን ያረጋገጠበት  ከትንሳኤ በአርባኛዉ ቀን ያለች ሀሙስ

9.       ጰራቅሊጦስ- ለሰዉ ልጅ ጥበብን የሚሰጥ መንፈስቅዱስን የላከበት ፤ አንድነት ሦስትነት የተረጋገጠበት ከትንሳኤ በሃምሳኛዉ ቀን

 9 ንዑሳን በዓላት

1.      መስቀል - የወንበዴዎች መቅጫ ወደ መድኃኒትነት የተለወጠበት  መስከረም 17

2.     ስብከት  - ነቢያት ይርዳል ይወለዳል እያሉ የተነበዩበት መታሰቢያ ታህሳስ 7

3.     ብርሃን -  ክርስቶስ በብርሃን እየተመሰለ የሚነገርበት ታህሳስ 14

4.     ኖላዊ  - ክርስቶስ እዉነተኛ እረኛ መሆኑን የሚዘገብበት ታህሳስ 21

5.     ጌና -  የክርስቶስ ልደት በ4 ዓመት አንድ ጊዜ የሚከበርበት ዐማኑኤል ተብሎ ይከበራል ታህሳስ 28

6.     ግዝረት - ግዝረት ሳይፈጸምለት ተገዝሮ መገኘቱ የሚከበርበት ጥር 6

7.     ቃና ዘገሊላ - በሰርግ ቤት የመጀመሪያዉን ተዓምር ዉሃዉን ወደወይን የቀየረበት ጥር 12

8.     ልደተ ስምዖን - ስምዖን አረጋዊ ለ300 ዓመት ሳይሞት ቆይቶ ጌታን ያየበት የታቀፈበት በዓል የካቲት 8

9.     ደብረ ዘይት - የጌታችን ነገረ ምጽአት የሚነገርበት የዐቢይ ጾም አምስተኛዉ እሁድ  (እኩሌታ)

 እነዚህን በዓላት በቃል መያዝ ያስፈልጋል ፤ በዕለታቸዉ ስጋ ወደሙ መቀበል ክርስቶስን መዋሃድ የእርሱን በዓላት ከእርሱ ጋር ማክበር ያስፈልጋል፤ የካቶሊክ ሆነ የፕሮቴስታንት አማኞች እነዚህን በዓላት አለማክበር ከክርስቶስ ዉጪ ሌላ ክርስቶስ እንዳለ ያስቆጥርባችኋልና አክብሩት!

 በየዕለቱ በተለይ በዕለተ አርብ የማንረሳቸዉ ህማማቶቹን እያሰብን አቡነ ዘበሰማያት ልንጸልይ ይገባናል፤ ነፍሳችን ከፊቱ ስትቀርብ ያደረግኹልሽን ዉለታ ተናገሪ የምትባለዉ እነዚህን ከታች የተዘረዘሩትን ነዉ!

1.      ተአስሮ ድኅሪት - ወደኋላ አጥንቱ እስኪገጥም መታሰር

2.     ተቀሥፎ ዘባን - ጀርባዉን መገረፍ

3.     ተኮርዖ ርእስ - ራሱን መመታት

4.     ወሪቀ ምራቅ - ምራቅ በገጹ ላይ መትፋታቸዉ

5.     አክሊለ ሦክ - የእሾህ አክሊል

6.     ፀዊረ መስቀል - መስቀል መሸከም

7.     ተጸፍኦ መልታሕት - ጉንጭ መመታት

8.     ሰትየ ሐሞት - ሐሞት መጠጣት

9.     ቅንዋት ዘየማን እድ - የቀኝ እጅ መቸንከር

10.    ቅንዋት ዘጸጋም እድ - የግራ እጅ መቸንከር

11.     ቅንዋት ዘየማን እግር - የቀኝ እግር መቸንከር

12.    ቅንዋት ዘጸጋም እግር - የግራ እግር መቸንከር

13.    ዘእንግዳ ቀኖት - የደረት መቸንከር

ተዘከርዎ ለክርስቶስ ወሰናያቲሁ ኢትርስኡ - ክርስቶስን አስቡት ያደረገዉን መልካም ነገርም አትርሱ !

ሃገራችን በሰማይ ነዉ ፤ ደግ እንሁን ፤ በተስፋ እንኑር፤ መልካሙን ብቻ እናስብ፤ ክፉ ከአፋችን እንዳይዎጣ ምላሳችን እንቆጣጠረዉ፤ በየቀኑ ምን ያህል መልካም ነገር ተናገርኩ ብለን ራሳችንን እንጠይቀዉ፤ አምላካችን በሰማይ በደስታ እንድንኖር ያድርገን ፤ የእመቤታችን ድንግል ማርያምን ትንሳኤ ሃዋርያት እንዳዩ ሃገራችንን ትንሳኤዋን ያሳየን ፤አሜን ! ! !




Thursday, June 25, 2020

የመላእክት በሰባቱ ዕለታት ሹመት !


ሰዉ በፈቃደ እግዚአብሔር በአባት እና እናት ሩካቤ በተዋኅዶ ምስጢር በማኅጸን ዉኃ ሆኖ ተቋጥሮ በመንፈስ ቅዱስ ሠዓሊነት እናቱን ወይም አባቱን መስሎ ተቀርጾ (እናት ወይም አባት ካልመሰለ ችግር አለ! የሴት ልጅ ማኅጸን እንደ እርሻ መሬት ስንዴ ተዘርቶ ተልባ ስለማይበቅል እና የተሰጠዉን ማስገኘት ስለሚኖርበት) በሰፋድል ተጠቅልሎ ዘጠኝ ወር ሲቀመጥ በፈጣሪያችን ድንቅ ጥበብ ተጠብቆ ይወለዳል፤ ሲወለድ የአዳም ልጅ ስለሆነ ብቻ (እምነት ሳይጠየቅ) ሁለት መላዕክት በቀን እና በሌሊት ሊጠብቁት ይታዘዛሉ፤ ከመላዕክት ጋር ግንኙነታችን በዚህ ይጀምራል፤ በሃይማኖት እያደግን ስንሄድ እነዚህን መላዕክት ተጠቅመን በሰዉ ስለ ሌሎች ሰዎች ማወቅ እና መናገር እንችላለን፤
በሰባቱ ዕለታት ሰባቱ ሊቃነ መላዕክት ተሹመዉባቸዋል ፤ ጸሎታችንን ለማሳረግ እኛን ለመርዳት፤ከአደጋ እንዲጠብቁን ፤ ዉሃዎች አጋንንት እንዳያድሩባቸዉ ለመጠበቅ ፤ ስዕለት ልመና እንዲደርስልን ፤ ከደዌ ለመፈወስ ፤ ልቦናችን ወደ ጸሎትና ምስጢር ወደ መመርመር እንዲሄድ ፤ ጾም እንድናዘወትር ያለ ሰዓት እንድንበላ ከርስ ላይ ያለዉን ሰይጣን ለመገሰጽ፤ ከሳምንቱ አንድ አንድ ዕለታት ይዘዋል ፤ ለዚህ ማስረጃ ቤተክርስቲያናችን ቅዳሴ ከተፈጸመ በኋላ ህዝቡን ዲያቆኑ ከማሰናበቱ በፊት የሚጸለይ ወዕቀቦሙ(ጠብቃቸዉ) ጸሎት ላይ ወመልአከ ዛቲ ዕለት ቅድስት ፤በዚህች ዕለት በተሾመ መልአክ ብሎ ያሰታዉሳቸዋል ያን ጊዜ የመልአኩን ስም አስገብተን መጸለይ ነዉ፤ ይኽ ጸሎት በቀደሙ አባቶቻችን ጊዜ ሕዝቡ እንዲሰማዉ ይደረጋል የዛሬን አያድርገዉና በተለይ አዲስ አበባ፤ መላእክት በሰባቱ ዕለታት ስለተሾሙ በዕለቱ የተሾመዉን መልአክ አንስቶ አሳርግልኝ ማለት ይገባል፤
ሰኑይ (ሰኞ) ቅዱስ ሚካኤል - መልአከ ምክሩ ለልዑል ፤ ሠሉስ (ማክሰኞ) ቅዱስ ገብርኤል - አብሣሬ ትስብዕት ፤ ረቡዕ ቅዱስ ሩፋኤል - አቃቤ ኆኅት (የቤተ መቅደስ ጠባቂ) ፤ ሐሙስ ቅዱስ ራጉኤል - መጋቤ ብርሃናት ወሃብታት ብርሃናትን የሚያዝ ሃብት የሚያሰጥ፤ አርብ ቅዱስ ዑራኤል - አኃዜ ጽዋ ዘብርሃን ፤ ቀዳሚት (ቅዳሜ) ቅዱስ ሳቁኤል - ፈዋሴ ዱያን ፤ እሑድ ቅዱስ ፋኑኤል - ሰዳዴ ሰይጣናት ፤
ሰዉ መላእክትን መምሰል ይችላል፤ እንደገና ለመሰራት ፈቃደኛ ከሆነ ! አሁን ያለዉ አነዋወራችን በተለይ ለወጣቶች (20-40 ዕድሜ) በአለባበስ (የምዕራባዉያን አልባሳት መተዉ) ፤ በአመጋገብ (ኢትዮጵያ የራሷ ምስጢራዊ ምግብና መጠጦች አሏት) ፤በአነጋገር (እንደ አባቶቻችን ከመናገር ማድመጥን ማስቀደም እና አስቦ መናገር) ፤ እነዚህን የቤት ስራዎች የሰራ ሌላ ቢሰጠዉም አያቅተዉምና የመላእክት ቤተሰብ ወደ መሆን ይሸጋገራል ፤